A infancia esquecida

Quen non lembra a Bola de Cristal? Barrio Sésamo, Telegato, David el Gnomo, DArtacán y los tres mosqueperros, Willy Fogg, Planeta Imaginario, Los Mundos de Yupi, Carteiro Pat, Érase una vez..., La Aldea del Arce, Alfred J. Kwak, As bolas máxicas, Oliver y Benji, Los Diminutos, Los Snorkels, Fraggle Rock, Os Pitufos... Tantos e tantos nomes de series, de debuxos animados, de programas... Lembranzas dunha infancia, que xa pasou e nunca volverá.

Alguén podería enumerar a mesma cantidade de programas dedicados ao público infantil e xuvenil da actualidade (e non valen os Lunnis e Pocoyo)?

Se damos un pequeno repaso ás programacións das canles de tevé xenéricas podemos ver que, salvo a 2 e a Galega, no resto, a progración dedicada a rapaces e raparigas menores de 12 anos é practicamente (por non dicer totalmente) inexistente.

As series, os debuxos, destinados a esta franxa de idade, foron substituídos, aos poucos, por culebróns, programas do corazón, de sucesos (con novas totalmente morbosas e sen interese real)... e, cando hai debuxos, son, na realidade, pensados para adultos (Padre de familia, Los Simpsons, Futurama...).

Cando se cambiou o entretimento da infancia por outra cousa que dera máis rendimento económico? Cando os directivos das tevés decidiron relegar aos pequenos e pequenas ao esquecimento? Cando deixou de impartarlles respeitar as mentes destes pícaros, intoxicándoas diariamente con xente a pelexar nos programas do corazón, con palabras cheas de raiba traizón mesquindade ciúmes, con imaxes cheas de todo o negativo que ten o ser humano? Cando lles dá igual saltar o horario protexido?


A tevé, a grandes trazos, é, hoxe en día, un grande cubo do lixo, e todo ese lixo estase a verquer nas mentes inocentes das crianzas.

Non nos sorprendamos, entón, que logo, na adolescencia, vivan a vida do mesmo xeito que a ven na televisión.